أخبار عالميّة من مركب "يولارا" المتجه إلى غزة: المخرج المصري باسل رمسيس يوجه الرسالة التالية
نشر في 02 سبتمبر 2025 (12:15)
من مركب "يولارا" المتجه إلى غزة، توجه باسل رمسيس المخرج المصري المقيم في أسبانيا بالرسالة التالية:
"صباح الخير على الكل من قارب "يولارا"، واحد من القوارب اللي رايحة على غزة.
أولا: وصلتني كمية مذهلة من الرسايل والتعليقات المشجعة والداعمة، واللي ماليانة حب ودفا وانحياز لفلسطين. ألف شكر بجد. التجربة دي مش سهلة، ولا عليا ولا على أي حد من المشاركين في قافلة الصمود. لكن رسايلكم وتعليقاتكم، (اللي لحقت اقراه منها، لأني لسة مالحقتش أقراها كلها)، مدياني طاقة حلوة، وبتقويني، وبنفعل بيها. بكيت مرات كتيرة وأنا بقرا اللي قدرت أقراه منها. وبالذات رسايل من غزة وبقيت مناطق فلسطين، اصدقاء وصديقات، وناس معرفهاش.. بيشجعوني وبيقولولي ان قلوبهم معانا.
ثانيا: بعتذر عن أني ماردتش على أي رسائل، بس الأيام اللي فاتت كانت صعبة جدا، وزحمة جدا، وماليانة حاجات لازم تتعمل، وتوتر، وشوية فوضى، ولسة كمان. ودلوقتي إحنا على المركب في نهاية عاصفة بدأت إمبارح بالليل، لكنها انتهت من دقايق. فيا مسهل. ده غير أن تليفوني ورقمي الأصلي مش معايا، سيبتهم في إسبانيا عشان مايتصادروش لو حصل اقتحام للقافلة. والتليفون اللي بكتب عليه، وببعت منه رسايل لموقع المنصة هايترمي في البحر وقت اللزوم. عشان كدة صعب أرد أو أتفاعل. بعتذر فعلا.. بس لما تنتهي المهمة هارد وهاحكي كتير.
ثالثا: فيه مراكب اضطرت ترجع لميناء برثلونة لأن العاصفة اجبرتها على العودة. لكن مركبنا من ضمن المراكب المكملة. مركب صغير وعليه مجموعة من اربع نساء وتلات رجالة.. مصممين نكمل. وهاحاول يوميا انشر اليوميات على موقع المنصة.
رابعا وأخيرا: عندي رجاء.. كل اللي بيدعموني وبيدعموا القافلة، ومنحازين للحق الفلسطيني.. بلاش تشتبكوا أو تردوا على اللي بيهاجمونا أو بيتريقوا علينا. لأن ده هدفهم، ان التركيز يبقى على خناقة حوالين أفراد. مش إحنا المهمين.. المهم الوحيد دلوقتي هو الشعب الفلسطيني في غزة. وأننا نكسر الحصار، وتبقى مجرد خطوة باتجاه وقف ابادته وتجويعه.
شكرا مرة تانية.. وعاشت فلسطين حرة من النهر للبحر.
